Ким Чон Нам 2012 йилда ўз укаси, КХДР етакчиси Ким Чен Инга хат юбориб, у ва унинг оиласи аъзолари ҳаётини сақлаб қолишни сўраган. Бу ҳақда Корея Республикаси Миллий разведка хизмати директори Ли Бён Хо парламент депутатлари учун брифингда маълум қилди, деб ёзади «ТАСС».
«Ким Чон Нам Шимолий Кореяда ҳокимият тепасига келган укасини на унинг ўзи, на унинг фарзандлари ҳокимиятга даъвогарлик қилмаслигига ва фақат КХДРдан ташқарида тинч ҳаёт кечиришни исташига ишонтирган», — деди у.
У, шунингдек, Ким Чон Намнинг собиқ хотини айни пайтда Пекинда ўғли билан яшашини, иккинчи хотини эса икки фарзанди билан Макаода истиқомат қилишини айтди.
Уларнинг барчасига Хитой ҳукумати томонидан соқчилар тайинланган. Разведка директори Ким Чон Нам ҳеч қачон Жанубий Кореяга бошпана сўраб мурожаат қилмаганини ва дўстларининг бундай маслаҳатларини эътибордан четда қолдирганини маълум қилди.
Ли Бён Хо, шунингдек, КХДР етакчиси акасининг заҳарланганини тасдиқлади, аммо ҳодиса билан боғлиқ вазият ҳозирча номаълум эканлигини айтди.
Разведка тахмин қилишича, КХДР махсус хизматлари Ким Чен Ин ҳокимият тепасига келганидан буён — сўнгги беш йил давомида Ким Чон Намни таъқиб қилиб келган, бироқ ушбу режаларга Хитой ҳукумати тайинлаган соқчилар халал берган. Қотиллар учун қулай вазият Малайзия аэропортида юзага келган.
Малайзия полицияси пойтахт аэропортида вафот этган КХДР фуқароси Ким Чон Нам эканлигини тасдиқлади. «У Макаога парвозни кутиб, иккинчи терминалда ўтирган. Бу одам ердаги хизматлар ходимларига мурожаат қилиб, кучли бош айланишидан шикоят қилган. У, шунингдек, номаълум кимса унинг юзига суюқлик сепиб юбориб, сўнг қочиб кетгани ҳақида айтиб берган», — дея маълум қилди Селангор штати полицияси раҳбарининг ёрдамчиси.
Изоҳ (0)