Европа Чемпионлар лигасининг 1/8 финалидан жой олган «Бенфика» — «Боруссия Дортмунд» ўйини мезбонларнинг 1:0 ҳисобидаги ғалабаси билан якунига етди. УЕФА расмий сайти статистикасида эса устунлик аксинча, меҳмонлар томонида бўлганини кўриш мумкин.

Биз шунчаки яхши эмас, балки ажойиб футбол намойиш қилдик. Биз фақатгина иккинчи бўлим бошида ўзимизни йўқотиб қўйдик ва тўпни икки бор олдирдик. Бироқ қанчалик яхши кўринмайлик, мағлубиятга чидашга мажбур бўлдик. Бунақаси фақат футболда бўлади. Бахтимизга олдинда жавоб ўйини бор.

Танаффусдан кейин рақиб ёппасига ҳужумга ўтиб кетди. Ҳимоядаги учлигимиз эса кўринишидан бунга тайёр эмасди. Бундай вақтларда тўпни олдинга тепиб юборавериш керак, шунда ҳеч қандай камчилик содир бўлмасди.

Обамеянг Африка Миллатлар кубогидан кейин тўлиқ тикланиб улгурмади. Пенальтини ура олмаганидан сўнг ўйинини йўқотиб қўйди. Бир тарафдан афсусдаман, иккинчи томондан ўйинимиздан хурсандман.

Томас Тухель, «Боруссия Дортмунд» бош мураббийи

Биз зўр ўйнадик, айниқса биринчи бўлимда. Гол уриш учун ҳам кўпроқ имкониятга эга эдик, ҳатто пенальти ишлаб олгандик. Хуллас, ютиб кетишимиз мумкин эди.

Ҳаммаси жавоб ўйинида ҳал бўлади. Биз яхши футбол ўйнай олишимизни ўшанда ҳам кўрсатамиз. Чунки бугун ҳаммасини тўғри бажардик, фақатгина нуқта қўйишда оқсадик. Бунақаси бўлиб туради.

Андре Шюррле, «Боруссия Дортмунд» аъзоси

Бу ақлга сиғдириш қийин бўлган ғалаба бўлди. Ростини айтсам бундай ўйинларга изоҳ бериш осон эмас. Мен «Боруссия»нинг кучли рақиб эканини ва бугун майдонда устунлик қилганини тан оламан.

Биринчи бўлимда ҳимоямизга нимадир етишмади. Танаффусдан кейин ўзимизга келиб олдик. Бундан ташқари «Боруссия»га қарши ўйинда стандартларни қандай амалга ошириш устида ишлагандик ва бу бизга қўл келди.

Дортмундда қийин бўлади. Бироқ олдинга силжишимиз учун асосларимиз бор. Ҳозирча эса дарвозабон Эндерсонни табриклайман. У юқори классдаги посбон эканини яна бир бор намоён этди. Аҳир у гуруҳ босқичида энг кўп гол урган жамоадан гол ўтказмади.

Руй Витория, «Бенфика» бош мураббийи

Луизао

«Бенфика» клуби сардори Луизао жамоаси учун юбилей — 500-учрашувни «Боруссия Дортмунд» клубига қарши ўйинда ўтказди.

36 ёшли Луизао 2003 йил «Бенфика» сафига Бразилиянинг «Крузейро» клубидан келиб қўшилганди. Ўтган вақт давомида у беш карра Португалия чемпионлигини қўлга киритди ва икки бор мамлакат кубогини баланд кўтарди.

«Бенфика» сафида энг кўп ўйин ўтказган футболчи эса Таманйини Нане ҳисобланади. У 1968 йилдан 1986 йилга қадар жамоаси учун 575 учрашувда майдонга тушганди.