«Барселона» клуби ҳужумчиси Луис Суарес Испания кубогининг «Алавес»га қарши бўлиб ўтадиган финал ўйинида иштирок эта олмайди. Бу ҳақда «Sports.ru» хабар берди.
Уругвайлик ҳужумчи ярим финалнинг «Камп Ноу»да бўлиб ўтган «Атлетико»га қарши ўйинида майдондан четлатилганди. Испания футбол уюшмасининг ҳакамлар қўмитаси уни бир эмас, икки беллашувда ўйнатмасликка қарор қилган.
Аввалига сариқ, кейинроқ эса қизил карточка олгани учун Суарес аслида 1 та учрашувни ўтказиб юбориши керак эди. Бироқ ҳакам қаршисидаги номақбуллиги учун қўмита унга битта учрашувлик дисквалификацияни кам деб топди.
Бу қарор «Барселона» раҳбариятига ёқмади. Айтилишича, Каталония клуби қарор устидан апелляция беришга ҳам улгурган. Бунда Каталония клуби ютиб чиққан тақдирида ҳам Суарес финал ўйинини қўйиб юборишга мажбур бўлади. Ғолиблик фақатгина келаси мавсум учун Испания кубогида Суаресга енгиллик яратиши мумкин бўлади холос.
Ҳакамлар қўмитаси «Барселона» фойдасига ишлайдиган қарорини ҳам эълон қилган. «Атлетико»га қарши учрашувда Серхио Бускетс рефери томонидан ўйинни чўзгани учун огоҳлантирилганди. Вазиятни атрофлича ўрганиб чиққан қўмита Бускетсни айбсиз деб топди. Футболчи майдонда иккита тўп борлигини кўргани учун, уни майдон ташқарисига чиқариб юборишга ҳаракат қилган бўлиб чиқди.
Маълумот учун, Испания кубогининг финал ўйини 27 май куни бўлиб ўтади. Айни пайтда финалга қайси стадион мезбонлик қилиши борасида мунозаралар давом этмоқда.
Изоҳ (0)