Хитойдаги Tesla электромобилларининг паради Гиннеснинг рекордлари китобига кирди
Автомобильлар парадида 145 та Model S хэтчбеки ва юзтача Model X кроссовери қатнашди. Натижа Гиннеснинг рекордлари китобига киритилди, деб хабар беради «Мотор».
Тадбир давомида электрокроссоверлар футбол майдонида «Х» ҳарфи кўринишида йиғилди. Шундан сўнг улар «янги йил шоусини» ижро этишди, бу Model X’да янги йилдан олдин дастурий таъминотни янгилаш натижасида очилган янги имконият ҳисобланади.
Бу имконият мультимедиа тизимидаги алоҳида бўлим ёрдамида фаоллаштирилади. Шундан сўнг автомобилни тарк этиш, эшикларни ёпиш ва масофадан бошқариш пультидаги қулфларни ёпиш тугмасини босиш талаб қилинади. Ёритиш қурилмаларининг тартибсиз ёниб ўчиши ва Model X орқа эшикларининг Wizards in Winter мусиқаси остида ҳаракати бошланади.
2016 йил якунидаги ҳолатга кўра, Хитойдаги электромобиллар сони 600 мингтадан ошди. Бу 2015 йилга нисбатан икки баравар кўп. Мамлакат ҳукумати 2030 йилгача электромобиллар сонини 15 миллиондан оширишни режалаштирган. Бундан ташқари қувватлаш станциялари тармоғини жидддий равишда кенгайтириш ҳам ҳукумат режалари қаторидан ўрин олган.
Motor1 порталининг таъкидлашича, 2016 йилда интернет тармоғида Tesla’нинг Хитойда завод очиш режалари ҳақидаги маълумот пайдо бўлди. Кўп миллиардли лойиҳада Jinqiao Group давлат компанияси ҳамкор бўлиши тахмин қилинган эди. Бироқ Tesla раҳбарияти ушбу хабарни рад этган.
Бугунги кунда Tesla электромобилларининг дунёдаги умумий сони тахминан, 200 минг донани ташкил қилади. Тайёрланаётган ҳамёнбоп Model 3 маркаси савдо ҳажмини жиддий ошириши кутилмоқда. Режалаштирилаётган ишлаб чиқариш ҳажми йилига 500 мингтагача бўлади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
