Барселонанинг Mundo Deportivo нашри Ла лига биринчи давраси якунига етгач, Мадриднинг «Реал» ва Каталониянинг «Барселона» клублари иштирокидаги ўйинларни таҳлил қилиб чиқди, деб ёзди «Sports.ru».
Нашрнинг аниқлик киритишича, биринчи давра давомида «Реал» ҳакамлар хатоси сабаб қўшимча 8 очко ишлаб олган бўлса, «Барселона» 4 очко йўқотган. Қайд этиш керак, айни вақтда Мадрид клуби ихтиёрида 1 та захира ўйини бор ҳолатда рақибидан 2 очкога ўзиб кетган.
«Сельта»га қарши «Реал»нинг 2:1 ҳисобидаги ғалабаси билан якунига етган ўйинда ҳакамлар яққол офсайдни пайқамай қолган ва вазият Альваро Моратанинг голи билан якун топган. Худди шундай, Серхио Рамос «Малага»га қарши 2:1 ҳисоби билан тугаган ўйинда гол урган. «Эспаньол» (2:0) ва «Депортиво» (3:2) клубларига қарши ўйинларда ҳам реферилар «Қироллик клуби»нинг фойдасига адашган.
Ҳакамлар «Барселона»нинг саккиз учрашувида нотўғри қарорлар қабул қилган ва шуларнинг учтасида Каталония клуби очко йўқотган. «Сельта»га қарши 3:4 ҳисобидаги мағлубиятли учрашув давомида ҳакам Неймарга қарши ишлатилган қўполлик учун пенальти белгилашга жазм этмаган. 0:0 ҳисоби билан якунига етган «Малага»га қарши ўйинда эса Пикенинг голи янглиш қарор сабаб офсайд сифатида баҳоланган. «Вильярреал» билан 1:1 ҳисобида якунига етган ўйинда ҳакамлар «Барселона» фойдаси учун ишлаши керак бўлган 2 та пенальти бермаган. Ҳар икки сафар «Вильярреал» футболчиси тўпни жарима майдончаси ичида қўли билан ўйнаганди.
Mundo Deportivo «Барселона» фойдасига ишлаган қарорни ҳам келтирган. «Реал Сосьедад»га қарши 1:1 ҳисоби билан якунига етган ўйинда ҳакамлар «Барселона» дарвозасига урилган тоза голни инобатга олмаган.
Нашр таҳлилни тўғри олиб борган бўлиб, очколар ўрнига қайтарилганида, Ла Лига пешқадами «Реал» эмас, балки «Барселона» бўлиши ҳам мумкин эди.
Изоҳ (0)