Президент коррупцияга қарши курашиш тўғрисидаги қонунни имзолади

Ўзбекистон Президенти Шавкат Мирзиёев 3 январь куни «Коррупцияга қарши курашиш тўғрисида»ги қонунни имзолади, у чоп этилган кундан эътиборан кучга кирди, деб ёзади «Газета.uz». Ҳужжат матни 4 январь куни «Народное слово» газетасида чиқди.

Қонуннинг мақсади коррупцияга қарши курашиш соҳасидаги муносабатларни тартибга солишдан иборат. Ҳужжатда «коррупция», «коррупцияга оид қонунбузарлик» ва «манфаатлар тўқнашуви» тушунчаларига таъриф берилган.

Ҳужжатга мувофиқ, коррупцияга қарши курашишнинг асосий принциплари қонунийлик; фуқароларнинг ҳуқуқ, эркинлик ва қонуний манфаатлари устунлиги; очиқлик ва шаффофлик, тизимлилик; давлат ва фуқаролик жамиятининг ўзаро ҳамкорлиги; коррупциянинг олдини олиш бўйича чораларнинг устунлиги ва масъулиятнинг муқаррарлиги ҳисобланади.

Шунингдек, қонунда давлат сиёсатининг коррупцияга қарши кураш соҳасидаги асосий йўналишлари, давлат бошқаруви соҳасидаги коррупция олдини олиш бўйича чора-тадбирлар, ижтимоий-иқтисодий тараққиёт ва тадбиркорлик соҳасидаги коррупция олдини олиш бўйича чоралар санаб ўтилган.