Самарқанд вилояти туман ва шаҳарларида «Президент арчаси» тантаналари ўтказилди
Самарқанд шаҳридаги байрам тадбирига вилоятдаги Меҳрибонлик уйлари, SOS — болалар маҳалласи тарбияланувчилари, хизмат бурчини бажариш чоғида ҳалок бўлган ҳарбий хизматчилар, ҳуқуқни муҳофаза қилиш идоралари ходимларининг фарзандлари, ота-она қаровисиз қолган болалар таклиф этилди. Бу ҳақда ЎзА хабар бермоқда.
Тадбир меҳмонлари — жажжи ўғил-қизларга Президентнинг Янги Йил совғалари топширилди. Қорбобо ва Қорқиз, турли эртак қаҳрамонлари иштирокидаги томошалар, бахтли болалик, Ватан мадҳига бағишланган қўшиқлар, шўх куйлар болаларга бир олам завқ улашди.
«Янги Йил байрамини яхши кўрамиз, — деди Самарқанд шаҳридаги 9-Меҳрибонлик уйи тарбияланувчиси Паризода Саидова. — Арча атрофида маза қилиб ўйнадик, қўшиқлар айтдик. Президентимизнинг бизга аталган совғалари байрамнинг энг катта совғаси бўлди».
Тадбирда Самарқанд вилояти ҳокими Ҳ. Оқбўтаев сўзга чиқди.
