Жанубий Осетиянинг номи Алания деб ўзгартирилиши мумкин
Тан олинмаган Жанубий Осетия республикаси президенти Леонид Тибилов 2017 йил апрелида ўтадиган президент сайлови билан бир пайтда мамлакатнинг номини ўзгартириш бўйича референдум ҳам ўтказиш лозимлигини маълум қилди. Бу ҳақда «ТАСС» хабар бермоқда.
«Референдум ўтказиш — серхаражат иш, уни президент сайлови билан бирга ўтказиш ақлдан бўлар эди», — маълум қилди у журналистларга.
«Январда биз президент ҳузуридаги сиёсий кенгаш йиғилишини ўтказишни режалаштирмоқдамиз, у ерда референдум қай тартибда ўтиши аниқлаштирилади», — қўшимча қилди Тибилов.
Аланлар — ўрта асрларнинг кўчманчи қабилаларидан бири бўлиб, уларнинг келиб чиқиши ҳақида турли қарашлар мавжуд. Шунга қарамай, Жанубий Осетия олимлари уларнинг осетинларнинг аждодлари деб билади ҳамда Аланияни мамлакатнинг «тарихий номи» деб ҳисоблайди.
