Boxing Day. «Суонси» янги мураббийини 3 ойдан кейиноқ бўшатиб юборди, «Челси» мураббийи Конте эса журналистларни ичимлик билан сийлади

Футбол бўйича Англия Премьер-Лигаси иштирокчиси ҳисобланган Уэльснинг «Суонси» клуби бош мураббий Боб Брэдлини ўз вазифасидан озод этди.

Брэдли «Суонси»ни қабул қилиб олганига 3 ой ҳам бўлмаганди. Шу йилнинг 4 октябрь куни у Франческо Гвидолин ўрнига янги мутахассис этиб тайинланганди.

Унинг бошқарувида «оққушлар» Премьер-Лига доирасида 11 та ўйинда майдонга тушди: 2 та ғалаба, 2 та дуранг ва 7 та мағлубият. Бу эса раҳбариятни қаноатлантирмади. Чемпионатнинг 18-туридан кейин «Суонси» 12 очко билан 19-ўринни эгаллаб турибди.

Аввалроқ Лондоннинг «Кристал Пэлас» клуби бош мураббий Алан Пардьюни истеъфога чиқариб, унинг ўрнини Сэм Эллардайсга берганди.

Райан Гиггз

«Манчестер Юнайтед» клубининг собиқ футболчиси «Суонси»ни бошқариши мумкин бўлган энг яхши номзод бўлиб турибди. Томонлар музокара бошлагани ҳақида аниқ хабар йўқ.

Гиггз мустақил равишда фаолият олиб бориш вақти келган деб ҳисобласа, «Суонси»даги бош мураббийлик курсисини эгаллаши мумкин. Жамоа йил охиригича катта эҳтимол билан унга имконият беради. Битта мавсумда 2 бор мураббий алмаштириш эса мантиқан тўғри эмас.

«Ливерпуль»дан янги рекорд

Юрген Клопп жамоаси бир вақтлар Брэндан Рожерс ўрнатиб кетган рекордни янгилади. 2013 йилги мавсум давомида «Ливерпуль» рақиблар дарвозасига 84 та гол урганди.

2016 йил бошидан буён эса жамоани Клопп бошқариб келмоқда. Ўзининг ихтиёрида яна 1 та ўйини бор бўла туриб «Ливерпуль», 2016 йил ҳисобидан 86 та гол уриб бўлди. Рекордни янгилаган голлар «Сток Сити» дарвозасига киритилди.

Антонио Контедан янги йил совғаси

Ўз рекордини янгилаш билан банд бўлган АПЛнинг яна бир клуби «Челси»да ишлар жойида. Кетма-кет 12 та ғалабани қўлга киритган жамоа бош мураббийи Антонио Конте «Борнмут»га қарши йирик ғалаба билан якунига етган учрашувдан кейин барча журналистларни стадион яқинидаги пабга таклиф қилди.

Журналистларнинг ишонтириб айтишича, Конте уларни Рождество билан қутлаган ва ҳар бирига яхши пиводан буюртма бериб, уларни сийлаган.

Жозе Моуриньо

Кетма-кет тўртта ғалаба «Манчестер Юнайтед» бош мураббийи Жозе Моуриньонинг кайфиятини кўтариб юборди ва у Поль Погба шаънига бисотидаги жамики чиройли сўзларни армуғон қилди.

АПЛ — қийин лига. Италияда 3—4 мавсум ўйнаб, Англияга келиб қолсанг, ўзингни бошқа дунёга тушиб қолгандек ҳис қиласан. Шунга қарамай Погба яхшидан ҳам яхшироқ ўйнамоқда. Ишончим комилки, у келаси мавсум энг яхши бўлади.

Ҳозир вазият шундай, «Олтин тўп»ни ютиш учун ҳужумчи бўлишинг керак. Агар бу ҳол ўзгарса, унда Погба «Олтин тўп» учун асосий даъвогар. У ажойиб ярим ҳимоячи, мен учун у энг зўри.

Жозе Моуриньо — «Манчестер Юнайтед» бош мураббийи

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.