АҚШда ҳиндуларнинг узоқ намойишларидан сўнг нефть қувури қурилиши тўхтатилди

АҚШ ҳукумати Шимолий Дакотадаги нефть қувури қурилишини номаълум муддатга тўхтатди ва қурилишнинг альтернатив йўналишларини кўриб чиқишни режалаштирмоқда. Бунга маҳаллий ҳиндуларнинг узоқ вақт давом этган намойишлари сабаб бўлди, деб ёзади TJournal.

АҚШ армияси муҳандислик корпуси раҳбариятининг сўзларига қараганда, қувур ётқизиш режаси қурилишнинг альтернатив йўналиши топилгунга қадар вақтинча тўхтатилган.

Бу жараён нефть қувури ўтказиш мамлакатнинг бошқа ҳудудлари экологиясига қандай таъсир қилиши аниқлангунга қадар узоқ муддатга тўхтаб қолиши мумкин.

Намойишчилар қурилиш ишларининг тўхтатиб қўйилишини хурсандчилик билан қарши олди. Бироқ АҚШ президентлигига сайланган Дональд Трамп нефть қувури қурилишининг дастлабки стратегиясини қўллаб-қувватлашини маълум қилган.

Шимолий Дакотадан Иллинойсга қадар етувчи, узунлиги 1185 километрни ташкил этувчи қувур лойиҳаси 3,7 миллиард долларга баҳоланмоқда. Қувурнинг катта қисми қуриб бўлинган. Дастлабки режага кўра, Дакота ва Миннесота чегарасида қувур Миссиссипи дарёсини кесиб ўтиши керак. Бу эса 2016 йилнинг апрелида бошланиб кетган можаро ва намойишларга сабаб бўлди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.