Сурияда бир ҳафтада 2,5 мингдан ортиқ жангари афв этилди

Охирги бир ҳафта ичида Суриянинг турли ҳудудларида 2,5 мингдан ортиқ жангари афв этилди. Бу ҳақда Россия душман томонларни яраштириш маркази баёнот берди, деб хабар қилади «РИА Новости».

«Охирги ҳафтада Суриянинг турли ҳудудларида жами 2,5 мингдан ортиқ жангари афв этилди», — дейилади хабарда.

Жумладан, бугун, 4 декабрь куни Дамашқ вилоятидаги ат-Талл шаҳридан «Жабҳат Фатҳ аш-Шом» гуруҳига аъзо 500 дан ортиқ жангари, шунингдек, уларнинг 1,5 минг нафар оила аъзолари чиқиб кетди. Улар Сурия президенти эълон қилган амнистиядан фойдаланиб, қуролларини топширди ва шаҳарни ҳукумат қўшинларига топшириб, Идлибга йўл олди.