Канадада мактаб ўқувчиларини олиб кетаётган автобуснинг ағдарилиши оқибатида 14 киши шифохонага ётқизилди

Канаданинг Манитоба провинциясида мактаб ўқувчиларини олиб кетаётган автобуснинг ағдарилиши оқибатида 14 киши шифохонага ётқизилди. Бу ҳақда, CTV телеканалига таяниб, «ТАСС» хабар бермоқда.

Полиция маълумотига кўра, йўл-транспорт ҳодисаси Мэтисон-Айленд шаҳри яқинида содир бўлди. Ағдарилган автобуснинг ичида 25 бола ва 4 нафар катта ёшли киши бўлган.

Воқеа жойига тиббиёт вертолёти ва олтита тез ёрдам машинаси етиб келди. 14 нафар одам шифохонага ётқизилди. Уларнинг ҳаёти хавф остида эмаслиги таъкидланмоқда.

Автобусда 12–15 ёшли ўқувчилар бўлган. Йўл-транспорт ҳодисаси сабаблари ўрганилмоқда.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.