Роналду, Гризманн ва Месси ФИФА талқини бўйича 2016 йилнинг энг яхши футболчиси номига даъвогарлик қилади

Халқаро футбол федерацияси (ФИФА) 2016 йилнинг энг яхши футболчиси номига даъвогарлик қиладиган 3 ўйинчининг исмини эълон қилди. Бу ҳақда ФИФА матбуот хизматига асосланиб, «ТАСС» хабар бермоқда.

Йилнинг энг яхши футболчиси номига «Реал» ҳужумчиси Криштиану Роналду, «Барселона» етакчиси Лионель Месси ва «Атлетико» форварди Антуан Гризманн даъвогарлик қилади.

• 2016 йилнинг жаҳондаги энг яхши мураббийи бўлиш учун Зидан, Сантуш ва Ранери рақобатлашади

31 ёшли Роналду «Реал» билан ўтган мавсумда ЕЧЛ ғолиби ва Португалия билан Евро–2016 чемпиони бўлди. 29 ёшли Месси Испания чемпиони ва Кубоги соҳибига айланди. Аргентина термаси билан эса Америка Кубоги–2016 финалига қадар етиб борди. 25 ёшли Гризманн «Атлетико» сафида ЕЧЛ финалига, Франция терма жамоаси таркибида эса Евро–2016 финалига қадар етиб борди.

ФИФА 2016 йилнинг энг яхши футболчиси номини 2017 йилнинг 9 январь куни Цюрих (Швейцария)да бўлиб ўтадиган маросимда эълон қилади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.