Ростсельмаш Ўзбекистонда ўз маҳсулотларини ишлаб чиқаришни йўлга қўяди

Ростсельмаш Ўзбекистонда ўз маҳсулотларининг йиғма ишлаб чиқаришини йўлга қўйишни режалаштирмоқда, деб ёзади UzDaily.

Россия компанияси матбуот хизматининг маълум қилишича, Ростсельмаш ва «Чирчиқ қишлоқ хўжалик техникаси заводи» АЖ ўзаро ҳамкорлик тўғрисидаги меморандумни имзолаган.

Томонлар ушбу ҳужжат доирасида «Чирчиқ қишлоқ хўжалик техникаси заводи» АЖ базасида Ростсельмаш маҳсулотларини йиғма ишлаб чиқаришни ташкил этиш масалалари бўйича узоқ муддатли ва ўзаро манфаатли ҳамкорлик ўрнатиш истагини билдирди.

«Чирчиқ қишлоқ хўжалик техникаси заводи» АЖ бош директори Асадулла Сайдуллаев Ростов-Донга ташриф буюриб, у ерда Ростсельмашнинг агромашиналар ва қишлоқ хўжалик жиҳозларини ишлаб чиқариш қуввати билан танишди.

Ташриф давомида у, шунингдек, компания раҳбарияти билан келгуси ҳамкорлик тафсилотларини муҳокама қилди.

Бош директор ушбу лойиҳа Ўзбекистонга мамлакат қишлоқ хўжалиги техник базасини модернизация қилиш имконини беришини таъкидлаб ўтди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.