Ўзбекистонда 2016 йилнинг 10 ноябридан 2017 йилнинг 10 январигача ёнғин, йўл ҳаракати, электр ва саноат хавфсизлиги, газ, электр ва иссиқлик энергияси, кўмирдан хавфсиз ва оқилона фойдаланиш икки ойлиги давом этмоқда. Бу ҳақда ЎзА хабар бермоқда.

Жорий йилнинг ўтган даврида фуқароларнинг эътиборсизлиги оқибатида 619 та ёнғин содир бўлиб, уларнинг аксарияти очиқ майдонларда олов ёқиш, электр ускуналари носозлиги, электр симларининг қисқа туташуви натижасида келиб чиққан. Бунинг натижасида 1 миллиард 228,8 миллион сўмлик моддий зарар кўрилган. Ёнғинлар сони ўтган йилнинг шу даврига нисбатан камайган бўлса-да, фуқароларнинг тан жароҳати олиши ортган.

Ёнғин хавфсизлиги бошқармаси ходимлари томонидан фуқароларнинг ўзини ўзи бошқариш идоралари раҳбарлари ва профилактика инспекторлари билан ҳамкорликда аҳоли турар жойлари, кўпқаватли уйлар, иқтисодиёт тармоқлари, ижтимоий объектларда ёнғин хавфсизлиги бўйича ўтказилган тадбирлар натижасида ёнғин хавфсизлиги қоидаларига риоя этилмаётгани учун раҳбар ва мутасадди ходимларга нисбатан 98 миллион 472 минг сўмлик маъмурий жавобгарлик белгиланди. Ёнғин хавфи аниқланган 323 корхона ва ташкилотлар фаолияти вақтинча тўхтатилди. 2 926 дона носоз электр ва газ ускунасидан фойдаланиш тақиқланди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.