Икки нафар россиялик — 19 ёшли қиз ва 23 ёшли йигит 24 ноябрь, пайшанба куни Швейцариянинг Тичино кантонида юз берган автоҳалокатда қурбон бўлди. Россиянинг Берндаги элчихонасида ҳалок бўлганларнинг шахси аниқланган ва уларнинг қариндошлари воқеа жойига етиб келган, деб ёзади «ТАСС».
Дипломатик ваколатхона ходими ҳалок бўлган қиз россиялик бизнесмен Платон Лебедевнинг набираси эканлигини тасдиқлади.
«24 ноябрь, пайшанба тонгги 04:00 да Кастаньола—Лугано автотрассасида автомобиль иштирокидаги йўл-транспорт ҳодисаси юз берди, унда Россиянинг икки нафар фуқароси бўлган. Полиция тахминига кўра, ҳайдовчи бошқарувни қўлдан чиқарган. Машина Лугано кўлига қулаб тушган», — деб таъкидлади элчихона вакили.
Элчихонанинг аниқлик киритишича, ҳозирги пайтда жасадларни олиб кетиш учун зарур ҳужжатлар расмийлаштирилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.