Парламент қуйи палатасининг янгиланган расмий веб-сайти тақдимоти бўлиб ўтди

Ўзбекистон Республикаси Олий Мажлиси Қонунчилик палатасида «Давлат ҳокимияти вакиллик органлари фаолияти очиқлигини таъминлаш жараёнларининг ҳуқуқий асослари» мавзуида давра суҳбати ўтказилди. Тадбир доирасида парламент қуйи палатасининг янгиланган расмий веб-сайти тақдимоти бўлиб ўтди, деб хабар беради ЎзА.

Олий Мажлис қуйи палатасининг Ахборот ва коммуникация технологиялари масалалари қўмитаси раиси И. Абдуллаев ва бошқалар фуқароларнинг сўз ва ахборот олиш эркинлиги, ахборот хавфсизлигини таъминлаш, ахборот-коммуникация технологияларини жадал ривожлантириш, давлат ҳокимияти вакиллик органлари фаолиятида очиқлик ва ошкоралик масалаларига алоҳида эътибор қаратилаётганини таъкидлади.

Қуйи палатанинг расмий веб-сайти фойдаланувчиларни олий қонунчилик органлари фаолиятининг кўплаб йўналишлари тўғрисида хабардор қилиб бориш билан бир қаторда парламентнинг жамоатчилик билан алоқаларини мустаҳкамлашда муҳим аҳамиятга эга.

Давра суҳбатида Олий Мажлис Қонунчилик палатасининг замонавий технологик платформада яратилган, ўзбек, рус ва инглиз тилларидаги шаклларга эга веб-сайтининг ўзига хос вазифа ва хусусиятлари, кенг имкониятлари ҳақида сўз юритилди.

Тадбирда жамият ва давлат ҳаётининг турли жабҳаларига замонавий ахборот-коммуникация технологияларини кенг жорий қилиш, очиқлик ва ошкораликни таъминлаш, давлат органларининг жамоатчилик институтлари олдидаги масъулиятини янада ошириш лозимлигига эътибор қаратилди.