Қозоғистон президенти Нурсултон Назарбоев айни пайтда ўзининг 2020 йилги президент сайловларидаги иштироки ҳақида гапиришни истамайди, аммо қонунчиликка кўра, у янги муддатга ўз номзодини қўя олади. Бундай нуқтаи назарини у Bloomberg агентлигига берган интервьюсида маълум қилди, деб ёзади «ТАСС».
«Агар қонунларимиз ва конституциямиз ҳақида гапирадиган бўлсам, улар менга бундан кейин ҳам ўз номзодимни қўйиш имконини беради», — деди Назарбоев. «Бироқ 2020 йилда нима бўлишини мен сизга айтмайман, чунки бу кўп омилларга боғлиқ», — дея таъкидлади у.
Шу билан бирга, президент фикрича, давлат арбоби ишида унинг лавозимдаги фаолияти давомийлиги эмас, унинг самарадорлиги муҳимдир. «Ўз фаолиятинг билан халқингга ва юртингга фойда келтираяпсанми, йўқми — асосий масала шунда деб ўйлайман», — дея аниқлик киритди у.
Аввалроқ Нурсултон Назарбоев мамлакат ҳокимиятини ўз фарзандларига мерос қилиб қолдирмоқчи эмаслигини айтган эди.
Изоҳ (0)