Австралия разведка жамиятининг юқори мансабли амалдорлари ИШИД гуруҳининг энг хавфли террорчиларидан бири, ушбу мамлакат фуқароси бўлган Нил Пракаш ҳибсга олингани ҳақидаги маълумотни тасдиқлади, деб ёзади «ТАСС» ABC телеканалига таяниб.
Мельбурнлик Нил Пракаш яқин вақтларгача Австралияда энг кўп қидирилган террорчилардан бири бўлиб келган. Аммо 2016 йил май ойи бошида мудофаа вазири Марис Пейн у Мосул шаҳри ташқарисида уюштирилган авиаҳужумда йўқ қилинганини эълон қилди.
NYT газетаси эса 24 ноябрь, пайшанба куни баҳорда олиб борилган авиаҳужумда жиноятчи фақат яраланганини, уни яқинда Яқин Шарқ мамлакатларидан бирида қўлга олишганини хабар қилди.
Австралия ҳуқуқ-тартибот органлари маълумотларига кўра, Пракаш ИШИД иерархиясида юқори мансабни эгаллаган, ушбу террорчилик гуруҳининг бош тарғиботчиларидан бири бўлган, қатор мамлакатлар, шу жумладан, Австралияда терактлар тайёрлашда қатнашган, тарғибот ва ёллаш фаолиятини олиб борган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)