Қозоғистон президенти Нурсултон Назарбоев мамлакат ҳокимиятини ўз фарзандларига мерос қилиб қолдирмоқчи эмаслигини айтди. Бу ҳақда у Bloomberg агентлигига берган интервьюсида маълум қилди, деб ёзади «ТАСС».
«Фарзандларимни наслий меросхўр қилишни кўзда тутаётганим йўқ, бу биз учун тўғри келмайди, деб ўйлайман», — дея Назарбоев сўзларидан иқтибос келтирди агентлик. «Бизда ҳокимиятнинг ўтказилиши (берилиши) конституцияда ёзиб қўйилган», — дея қўшимча қилди у ҳозирча ўз ўринбосари ҳақида ҳеч нарса дея олмаслигини таъкидлаб.
«2020 йилгача мен ишлайман, 2020 йилда эса биз сиз билан учрашамиз», — деди 2015 йилда яна беш йиллик муддатга қайта сайланган 76 ёшли Назарбоев.
Сентябрь ойида унинг тўнғич қизи Дариға Назарбоева Қозоғистон Парламенти Сенати депутатлигига тайинланган эди. Ўртанча қизи Динара Кулибаева эса турмуш ўртоғи Тимур Кулибаев билан мамлакатдаги иккинчи энг йирик банкни бошқаради.
Изоҳ (0)