Яшиллар партиясидан АҚШ президентлигига номзод Жилл Стайн Висконсин, Мичиган ва Пенсильвания штатларида овозларнинг қайта саналишига эришмоқчи эканлигини эълон қилди. Суд харажатлари учун талаб қилинадиган 2 миллион доллар бир неча соатда тўпланди, деб хабар беради TJournal.

Кампаниянинг коммуникациялар бўйича директори Дэйв Кобб ташаббус юзасидан маблағ тўплаш бошланишини Facebook’даги тўғридан-тўғри трансляцияда 23 ноябрь куни эрталаб эълон қилган эди. Ўша куннинг кечки соатларига қадар 2,5 миллион доллардан кўпроқ маблағ тўпланди.

Фаоллар адвокатлар ва кузатувчиларга кетадиган харажатни қоплаш учун яна шунча пул тўплашни режалаштирмоқда.

Бир қанча экспертлар бир-биридан мустақил равишда Мичиган, Пенсильвания ва Висконсин штатидаги овозларда «статистик аномалиялар» кузатиб, шу муносабат билан ташвишдалигини билдирган эди. Номзоднинг штаби шунга асосланган ҳолда овозларнинг қайта саналишига эришмоқчи.

Яшиллар бу билан Ҳиллари Клинтонга ёрдам беришни режалаштирмаётганини алоҳида қайд қилиб ўтди.

Кўрсатилган штатларда Трамп кичик устунлик билан ғалаба қозонган: Висконсинда у рақибидан 0,7 фоизга, Пенсильванияда 1,2 фоизга, Мичиганда эса 0,3 фоизга кўпроқ овоз тўплаган.