Хитойда яратилган магнит ёстиқчали поезд соатига 600 километр тезликка эришди
Хитойнинг CRRC компанияси маглев — магнит ёстиқчали поезднинг янги турини яратди. Такомиллаштирилган технологиялар келажак транспортига тезликни соатига 600 километрга чиқариш имконини берди. Бу ҳақда «Hi-Tech Mail.ru» хабар бермоқда.
Ўтган йили Япония маглеви соатига 590 километр тезликка эришганди. Бироқ поезд биринчи йўловчиларини 2027 йилдагина ташиши мумкин, чунки бундан олдинроқ мазкур транспорт линиясини қуришнинг имкони йўқ.
Хитой компанияси вакиллари янги турдаги маглев яратилгани ва аввалги рекорддан 10 километрга ошилганини билдирмоқда. Синовлар бунинг учун махсус қурилган 5 километр узунликдаги йўналишда амалга оширилди.
Мамлакатда ҳозирнинг ўзида ҳам маглевлар тўлақонли ишламоқда. Шанхай марказини аэропорт билан боғлайдиган йўналишда магнит ёстиқчали поездлар соатига 430 километр тезликда ҳаракатланмоқда.
