31 октябрь куни Ўзбекистоннинг Жидда шаҳридаги (Саудия Арабистони) дипломатик ваколатхонаси томонидан 4 декабрь куни ўтказиладиган Ўзбекистон Президенти сайловига бағишланган брифинг ташкил этилди. Бу ҳақда «Дарё»га ТИВ матбуот хизмати хабар берди.
Тадбирда халқаро ташкилотлар, шу жумладан, Ислом ҳамкорлик ташкилоти, Ислом тараққиёт банки, IINA халқаро ахборот агентлиги вакиллари, Жиддадаги хориж давлатлари дипломатик ваколатхоналари раҳбарлари, Яқин Шарқ стратегик ва ҳуқуқий тадқиқотлар маркази экспертлари, шунингдек, маҳаллий ОАВ ходимлари иштирок этди.
Брифинг чоғида иштирокчилар Ўзбекистон Президент сайловини ўтказишга кўрилаётган тайёргарлик, миллий сайлов қонунчилиги, Ўзбекистондаги сайловларнинг очиқлиги ва шаффофлигини таъминлаш бўйича ҳуқуқ амалиёти, шунингдек, сайловда иштирок этаётган партиялар юзасидан батафсил маълумотга эга бўлди.
Тадбирнинг бир неча қатнашчиси Ўзбекистонда ўтиши кутилаётган Президент сайлови ҳақида ўз фикрини билдирди.
Ҳабиб Каъбачи, ИҲТ Департаментининг сиёсий масалалар бўйича директори:
«Ўзбекистонда халқаро стандартларга тўла жавоб берувчи миллий сайлов тизими шакллантирилган, масалан, кўпчилик мамлакатлардан фарқли равишда, Ўзбекистонда Марказий сайлов комиссияси доимий ишлайдиган конституцион орган ҳисобланади, бу эса сайлов жараёнини демократик принциплар асосида ташкил этишга кўмак беради.
Ишончим комилки, яқинлашаётган Ўзбекистон Президенти сайлови кўплаб чет эллик кузатувчилар иштирокида, очиқлик ва ошкоралик руҳида ўтади».
Файсал ас-Саъдий, «аш-Шарқ ал-Авсат» журналисти:
«Бугунги брифинг менга Ўзбекистон сайлов тизими ва қонунчилиги, Президентликка кўрсатилган номзодлар, шакллантирилган сайлов округлари ва участкалари, чет эл давлатлари ва халқаро ташкилотлардан таклиф этилган кузатувчилар, шунингдек, республика Марказий сайлов комиссияси фаолияти ҳақида кўп фойдали ахборотга эга бўлиш имкониятини берди.
Ўйлайманки, яқинлашаётган Ўзбекистон Президенти сайлови якунлари мамлакатнинг ижтимоий-сиёсий ва социал-иқтисодий ривожланишига хизмат қилади».
Наги Жабборов, ИҲТ Департаментининг иқтисодий масалалар бўйича ходими:
«2015 йилги Президент сайловида халқаро кузатувчи сифатида иштирок этиб, Ўзбекистонда сайлов тизими қай даражада батартиб ишлашига гувоҳ бўлдим. Ўзбекистон сайловчилари овоз беришда фаол иштирок этди ва ўз конституцион ҳуқуқларидан самарали фойдаланди.
Ўзбекистон ҳукумати ва халқига Президент сайловини муваффақиятли ўтказишни тилайман. Ишончим комилки, овоз бериш халқаро стандартларга ҳамда миллий қонунчиликка тўла мувофиқ равишда ўтади».
Изоҳ (0)