Британия молия вазирлиги қурилмаларни янги 1 фунтлик тангага мослаштиришга кўрсатма берди
Буюк Британия компаниялари 1 фунт стерлинг номиналли 12 бурчакли танганинг истеъмолга киритилишига тайёргарлик кўриши лозим. Бу ҳақда, мамлакат молия вазирлиги эълонига асосланиб, «Интерфакс» хабар бермоқда.
Қироллик зарбхонаси томонидан ишга туширилган сайтда компаниялар ўз ускуналарини янги танганинг шаклларига мослаштириши лозимлигидан огоҳлантирилади. Танга 2017 йил мартидан истеъмолга киритилади. Нақд пулларни қабул қилувчи барча автоматлар ўша пайтга қадар модификациядан ўтказилиши лозим.
Ярим йил давом этадиган ўтиш даврида компаниялар автоматлар ҳам эски, ҳам янги тангаларни қабул қилишини таъминлаши лозим. Шундан сўнг ҳозирги танга истеъмолдан чиқарилади, лекин кўпчилик банклар ва почта бўлинмалари эски тангаларни қабул қилишда давом этади.
