Стадиони таъмирланаётган Қаршининг «Насаф» клуби Олий Лигада қолган икки уй учрашувини Ғузорда ўтказади

Стадиони таъмирланаётган Қаршининг «Насаф» футбол клуби Олий Лигада қолган икки уй учрашувини Ғузор шаҳрида ўтказади. Бу ҳақда «аждарлар» матбуот хизмати хабар бермоқда.

Олий Лига 28-тури доирасидаги учрашувда «Насаф» Фарғонанинг «Нефтчи» жамоаси билан куч синашади. «Насаф»га тегишли «Марказий» стадионда реконструкция ишлари олиб борилаётгани сабабли, бўлажак ўйин Ғузор шаҳрида ўтказилади.

Хабарда таъкидланишича, «Насаф» – «Нефтчи» учрашуви 4 ноябрь, жума куни «Шўртан» клубига тегишли «Ғузор» марказий стадионида бўлиб ўтади. Учрашув соат 16:00 да бошланади.

Шунингдек, «Насаф»нинг Олий Лигадаги охирги, 30-турдаги Муборакнинг «Машъал» жамоасига қарши учрашуви ҳам Ғузорда ўтказилади.