Андижонлик 13 ёшли қиз халқаро мусиқий фестиваль совриндори бўлди
10–15 октябрь кунлари Озарбайжон пойтахти Боку шаҳрида ўтказилган анъанавий «Муғом» халқаро фестивалида Андижон вилояти Жалақудуқ туманидаги 18-болалар мусиқа ва санъат мактаби ўқувчиси Мафтуна Абдумухторова 3-ўринни эгаллади. Бу ҳақда ЎзА хабар берди.
Дунёнинг кўплаб давлатларидан истеъдодли ёшлар иштирок этган фестивалда Мафтуна ижросидаги миллий мақом қўшиқлари мухлислар ва мутахассислар томонидан юқори баҳоланди.
«‘Муғом’ халқаро фестивалида Ўзбекистон ёшлари ҳеч кимдан кам эмасликларини яна бир бор намойиш этганимиздан хурсандмиз, — деди Мафтуна. — Айниқса Увайсий ғазали билан айтиладиган ‘Токай’ қўшиғи барчанинг олқишига сазовор бўлди».
Энди 13 ёшни қаршилаган Мафтуна бунга қадар ҳам қатор танлов ва фестивалларда муваффақиятли иштирок этган.
