Apple компанияси iPhone 7’даги ишдан чиққан Home тугмасини виртуалига алмаштирди

Агар iPhone 7’даги Home («Уйга») тугмаси Taptic Engine’даги носозликлар туфайли ишламай қолса, тизим буни аниқлайди ва таъмир қилингунга қадар вақтинчалик ечим сифатида виртуал тугмани қўшади, дея хабар бермоқда TJournal.

Носозлик ҳақидаги билдиришнома ва Home виртуал тугмаси акс этган суратни MacRumors нашри форуми фойдаланувчиси эълон қилган. Унинг сўзларига кўра, iPhone 7 қувват олиш чоғида ўз-ўзидан ўчиб қолган. Қайта ёқилгандан сўнг Home тугмаси ишламай қолган ва хаптик хусусиятлари (турли ҳаракатларда телефон вибрацияси) ишдан чиққан.

Билдиришномада смартфонни сервисга олиб бориш кераклиги, унгача эса экран пастидаги виртуал Home тугмасидан фойдаланиш кераклиги айтилади. MacRumors тахмин қилишича, тугмадаги носозлик унинг Taptic Engine билан чамбарчас боғлиқлигига алоқадор бўлиб, унинг ишдан чиқиши сабабли умуман ишламай қолиши мумкин.

Расман Apple iPhone 7’даги янги Home тугмаларидаги носозлик ёки смартфонларнинг нуқсонли партияси ҳақида эълон қилгани йўқ.