Тошкентда реконструкцияси учун 27 млрд сўм сарфланган 4-шаҳар клиник шифохонаси фойдаланишга топширилди

Тошкент шаҳрининг Яшнобод туманидаги 4-шаҳар клиник шифохонаси реконструкция қилиниб, фойдаланишга топширилди. Шу муносабат билан бўлиб ўтган тадбирда давлат ва жамоат ташкилотлари вакиллари, олимлар, шифокорлар иштирок этди. Бу ҳақда ЎзА хабар берди.

4-шаҳар клиник шифохонаси пойтахтнинг Яшнобод, Бектемир, Миробод, Мирзо Улуғбек, Сергели туманлари аҳолисига хизмат кўрсатади. Ушбу тиббиёт муассасасида босқичма-босқич қурилиш-реконструкция ишлари амалга оширилди. Бу ишларга 27 миллиард сўмдан кўпроқ маблағ йўналтирилди.

Реконструкция ишлари натижасида клиниканинг барча бўлимлари замонавий қиёфага кирди. Биноларнинг атрофи ободонлаштирилиб, яшил ҳудудлар барпо этилди. Барча бўлимлар янги тиббий диагностика воситалари ва жиҳозлар — УТТ, МСКТ, рентген, лапароскопик воситалар, физиотерапия муолажаларини ўтказишда қўлланиладиган тиббий асбоб-ускуналар билан жиҳозланди.

Шифохонада Тошкент тиббиёт академияси, Тошкент педиатрия тиббиёт институти ва бир қатор ихтисослашган марказларнинг махсус кафедралари жойлашгани илмий-амалий ҳамкорликни ривожлантириш, тиббиёт ютуқларидан оқилона фойдаланишда муҳим омил бўлмоқда.

Тадбирда Ўзбекистон Республикаси Бош вазирининг ўринбосари А.Икромов сўзга чиқди.