Ўзбекистонлик дзюдочилар Ришод Собиров ва Абдулла Тангриев спортчилик фаолиятини якунлади. Бу ҳақда Ўзбекистон дзюдо федерациясининг бош котиби Дмитрий Адисман сўзларига таяниб, «1News.uz» хабар бермоқда.
«Рио–2016 Олимпиадасидан сўнг дзюдо терма жамоасининг деярли 80 фоизи янгиланди. Ҳозирда терма жамоа сафида асосан ёш ва истиқболли ўсмир йигит ва қизлар жой олди. Токио–2020 Олимпия ўйинларига қадар 4 йиллик тайёргарлик олдидан авлодлар алмашинуви вақти келди.
Хусусан, Ришод Собиров ва Абдулла Тангриев фаолиятини якунлади. Уларнинг ўрнига ким келади? Мураббийлар ёш спортчилар тажрибали ва таниқли фахрийлардан қолишмаслигига амин бўлди», – деди Дмитрий Адисман.
Маълумот учун, 30 ёшли Ришод Собиров Пекин–2008, Лондон–2012 ва Рио–2016 Олимпия ўйинларининг бронза медаллари соҳиби саналади. 35 ёшли Абдулла Тангриев эса 2008 йилги Пекин Олимпиадасида кумуш медаль соҳиби бўлган.
Изоҳ (0)