Ўзбекистоннинг Покистондаги элчихонасида мамлакат ижтимоий-сиёсий, эксперт-таҳлил ва ишбилармонлик доиралари, етакчи ОАВ вакиллари иштирокида Ўзбекистон Президенти сайловларига бағишланган брифинг бўлиб ўтди. Бу ҳақда «Жаҳон» ахборот агентлиги хабар бермоқда.
Тадбирда Election Times газетаси бош муҳаррири, Покистон адвокатлар ассоциацияси доимий аъзоси Сафир Ҳусайн Шоҳ ва Dispatch News Desk ахборот агентлиги бош муҳаррири, «Покистон—ўзбек маданий форуми» ташкилоти президенти Оға Иқрор Хорун маърузалари тингланди.
Сафир Ҳусайн Шоҳ Ўзбекистонда президентлик сайловларига тайёргарликни диққат билан кузатиб бораётганини таъкидлади. Унинг фикрича, республикада сайлов жараёнида қонун устуворлиги ва номзодлар сайловолди тарғиботи ўтказишида тенг ҳуқуқ ва имкониятлар берилиши тамойилларига жиддий эътибор берилмоқда.
Оға Иқрор Хорун брифинг иштирокчилари диққатини Ўзбекистон сайлов қонунчилигида овоз бериш учун барча шароитлар кўзда тутилгани, жумладан, беморлар, қариялар ва кўп болали оилалар эҳтиёжи инобатга олинганига қаратди.
Икки маърузачи ҳам Ўзбекистонда 2015 йилда бўлиб ўтган президентлик сайловларида қатнашгани ва мазкур сиёсий жараён ўтказилишидан қониқиш билдирганини эслатиб ўтди.
Тадбир қатнашчилари қонун устуворлиги ва Марказий сайлов комиссияси мустақиллиги таъминланган Ўзбекистонда бўлажак сайловлар очиқ-ошкора, умум эътироф этилган демократик тамойилларга биноан ўтишига ишонч билдирди.
Изоҳ (0)