ЮНЕСКО раҳбари тинчлик бўйича Нобель мукофотининг Колумбия президентига берилишини ижобий баҳолади
ЮНЕСКО бош директори 2016 йилги тинчлик бўйича Нобель мукофотининг Колумбия президенти Хуан Мануэль Сантос Кальдеронга берилишини илиқ кутиб олди. Бу ҳақда ташкилотнинг Париждаги штаб-квартираси тарқатган баёнотда айтилди, деб хабар беради «ТАСС».
«Нобель қўмитасининг президент Хуан Мануэль Сантос Кальдероннинг ва Колумбиянинг тинчликка эришиш бўйича тарихий ташаббусини тақдирлаш қарори — қитъа ва бутун дунёда тинчлик йўлида бирлашишга бўлган қудратли чақириқдир», — дейилади баёнотда.
Таъкидланишича, «ярим аср мобайнида уруш, қочқинлар ва улкан қийноқлардан азият чеккан Колумбияга ушбу мукофотнинг берилиши тинчликка эришиш мумкинлигини кўрсатди».
Колумбия президенти мамлакат ҳукумати ва Колумбия инқилобий қуролли кучлари сўл радикал гуруҳи ўртасидаги ихтилофни бартараф қилиш йўлидаги ҳаракатлари учун Нобель мукофотига лойиқ кўрилди.
