Чеченистон раҳбари Рамзан Қодиров республикага раҳбарлик қилган йиллари давомида унга кўп бора суиқасд уюштиришганини айтди ва бундай уринишлар келажакда ҳам амалга оширилишига ишонч билдирди, деб ёзади «ТАСС».
«Ушбу йиллар давомида кўп бора суиқасд қилишди, бундан кейин ҳам шундай бўлади, бунга ишончим комил, чунки мени Чеченистон Республикаси конституцияси кафили ва Россия ватанпарвари сифатида … (баъзилар) ёқтирмайди. Лекин мен осонликча таслим бўлмайман, биз ўз республикамиз ва давлатимизни ҳимоя қиламиз», — деди Қодиров журналистларнинг саволларига жавоб берар экан.
Шу билан бирга, у ОАВда 2016 йил баҳорида унга нисбатан суиқасд тайёрлангани ҳақида пайдо бўлган хабарларни рад этди ва уларни «писта сотадиган кампирларнинг гапи» деб атади.
«Новая газета» нашри Чеченистоннинг Ножай-Юрт туманидаги Беной қишлоғида, Рамзан Қодиров қароргоҳида унга нисбатан суиқасд тайёрлангани, бу ердан портловчи қурилма, фитна иштирокчиларидан эса кўплаб қурол-аслаҳа мусодара этилгани, бир неча ўнлаб кишилар қўлга олинганини билдирганди.
Изоҳ (0)