Сентябрь ойида актёр ва режиссёр Азамат Аҳроровнинг жангари жанрда суратга олинган «Нотаниш қотил» номли фильми премьераси бўлиб ўтди. Шу муносабат билан журналист Феруз Муҳаммад фильм муаллифи билан суҳбат уюштирди.
— «Нотаниш қотил» фильмини тасвирга олиш жараёнида жуда кўп тан жароҳати олган экансиз, шу ростми?— Бу жангари фильм бўлгани учун, тасвирга олиш жараёни бошқа фильмларимга қараганда қийинроқ кечди. Ёшликдан спорт билан шуғулланганман, шу сабабли барча саҳналарни каскадёрсиз ўзим бажардим. Жанг саҳналаридан бирида Алихан ака (Нурмуҳаммадхон Ҳусниддинов) бурнимни синдириб қўйди. Ҳам бурним сингани, ҳам ўша вақтда қишнинг совуқ кунлари бўлгани сабаб, тасвирга олиш ишлари узоқ вақтга тўхтаб қолди.
— Гап-сўзларга қараганда, бу фильмни суратга олиш учун ҳатто уйингизни гаровга қўйган эмишсиз.— Ҳақиқатан ҳам, ҳеч бир фильмимга бу қадар катта маблағ кетмаган. Актёрларнинг гонарари, қиммат автомобиллар ва уйларнинг ижара ҳақи, фильм 4K форматда суратга олингани, тасвирга олиш жараёнининг чўзилиб кетгани учун ҳам жуда катта маблағ сарфланди. Фильм учун, тахминан, 170—180 миллион сўм кетди. Бунча маблағсиз бу фильмни суратга олиб ҳам бўлмасди. Ўзимга ёққан мавзуда фильм олиш учун бор нарсамни ўртага қўйиб бўлса-да ишга киришаман. Аммо уйимни гаровга қўйганим йўқ. Аксинча, «Нотаниш қотил» ҳомийлар кўмаги билан суратга олинди.
— Премьера куни Алишер Навоий номли киносаройда жуда катта тайёргарлик бўлди-ю, аммо ўзингиз тақдимотга кеч қолдингиз. Сиз ва актриса Шаҳзода Муҳамедованинг кечиккани сабаб, сизларни ҳатто келмайди, деб ўйлашди. Бунинг сабаби нима?— Бу масъулиятсизлик эмас. Ҳам режиссёрлик қилиб, ҳам бош ролда ўйнаганим учун ташкилий ишлар ўзимнинг бўйнимда қолиб кетди. Премьера куни жуда шошиб қолдим: вилоятдан келган меҳмонларни кутиб олиш, уларни ҳам премьерага олиб келиш керак эди. Ҳаммасини ўрнига қўйиб, премьерага келаман деганимда вақт кеч бўлган эди. Ўзимга боғлиқ бўлмаган ноқулайликлар учун барчага узримни айтиб қоламан.
— Фильм саундтрекини нега айнан Шоҳрух рэпер куйлади?— Фильм характери ва мавзусини куйда фақат Шоҳрух рэпер тўла очиб бериши мумкин эди. Тўғрисини айтсам, Шоҳрухнинг ижоди, унинг йўналиши ўзимга ҳам жуда ёқади. У билан ижодий ҳамкорлик қилганимдан хурсандман ва бу ҳамкорликни узоқ давом эттирмоқчиман. Фильм саундтрекига кетган пулни эшитганлар: «Бу пулга яна бир фильм олса бўларди», деган фикрларни ҳам билдирди. Аммо ҳар бир қилинаётган ишнинг ўз мақсади, қадр-қиммати бўлади. Саундтрекка кетган пул ўзини тўла оқлади, деб ўйлайман.
— Одатда, саундтрекни куйлаган хонанда фильм премьерасига ҳам келар, саундтрекни ҳам куйлаб кетарди. Шоҳрухни эса премйрерада кўрмадик.— Келишувимиз бошидан шундай бўлган. Фильмим Шоҳрух рэперга ёққани учун, унга атаб қўшиқ куйлаб, клипнинг трек жойларига видеога тушиб беришларини илтимос қилганмиз. Премьерага келиш-келмасликлари келишувимизда йўқ эди. Агар премьера куни гастрол сафарига кетмаганида, менимча, премьерага ҳам келган бўлардилар.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)