Шотландиялик боксчи Майкл Тауэлл рингда қабул қилиб олган зарбалари сабаб оламдан кўз юмди

Жанг чоғида олган жароҳатидан кейин шотландиялик боксчи Майкл Тауэлл шифохонада вафот этди, деб ёзди «Оламспорт».

Майк Британия чемпионлик камари учун юришини бошлаган бўлиб, эндигина саралаш доирасидаги жангларини ўтказаётганди. Глазгода у Дейли Ивинсга қарши рингга кўтарилди. Майк биринчи раундда кучли зарба ўтказиб юборди. Бешинчи раунддаги яна шундай зарбадан кейин эса уни рингдан замбилда олиб чиқиб кетишди.

25 ёшли чарм қўлқоп устаси зудлик билан шифохонага етказилган бўлса-да, докторларга унинг ҳаётини сақлаб қолиш насиб қилмади.

Профессионал рингда 13 та жанг ўтказган Майк Тауэлл, шуларнинг 1 тасида мағлуб бўлган ва 1 марта дуранг қайд этганди. Ўзининг фойдасига ҳал қилган 11 та жангнинг 8 тасида рақибларини нокаутга учратишга эришганди.