Евроиттифоқ мамлакатлари Париж иқлим келишувини ратификация қилишга тайёр

Европа Иттифоқига аъзо барча мамлакатлар ўтган йил охирида Париж иқлим саммитида қабул қилинган келишувни ратификация қилишга тайёрлигини билдирди. Бу ҳақда Европа кенгаши раиси Дональд Туск баёнот берди, деб хабар қилади «ТАСС».

Унинг сўзларига қараганда, қарор Европа кенгашининг табиатни муҳофаза қилиш идоралари раҳбарлари даражасида Брюсселда ўтказилган навбатдан ташқари йиғилишида қабул қилинган.

Учрашувдан кўзланган мақсад барча мамлакатлар, шу жумладан, Буюк Британиянинг ҳам 2016 йил охирига қадар келишувни ратификация қилиш борасидаги ҳаракатларини мувофиқлаштириш эди.

«Барча вазирлар Париж келишуви тез орада ратификация қилинишига яшил чироқ ёқди», — таъкидлади Туск.