Россияда йўловчи поезди енгил автомобиль билан тўқнашиб кетди

Россиянинг «Александров — Балакирево» станциялари оралиғидаги ҳудудда «Москва — Ярославль» йўловчи поезди енгил автомобиль билан тўқнашиб кетди. Бу ҳақда «РБК» хабар бермоқда.

Автомобиль ҳайдовчиси тирик қолди. У бош жароҳати билан шифохонага ётқизилган.

Ҳодиса 29 сентябрь, пайшанба куни содир бўлди. Темирйўл кесишмасидан ўтмоқчи бўлган ҳайдовчи йўл ҳаракати қоидаларини бузган. Поезд яқин масофада келаётгангани сабаб фавқулодда тўхташга улгурмаган.

Хабарда қайд этилишича, поездга зарар етган. Локомотивни уч соатдан кейин алмаштиришга эришилди. Ҳодиса оқибатида аварияга учраган поезд ортидан келаётган «Александров — Ярославль» поездининг ҳаракати тўхтатилди.