Ўзбекистон шаҳарларида Korea Festival 2016 тадбирлари ўтказилади

Ўзбекистонда Korea Festival 2016 номи остида бирлаштирилган бир қатор маданий тадбирлар ўтказилади. Бу ҳақда «Газета.uz» хабар бермоқда.

Бу борада «Туркистон-пресс» агентлиги билан суҳбатда Корея Республикаси элчиси Квон Ён У маълум қилди.

Унинг таъкидлашича, фестиваль бир қанча тадбирларни ўз ичига олади. У Кореянинг ташкил топиши санасига мўлжаллаб 12 октябрь куни бериладиган қабул билан бошланади. 13 октябрь куни дизайнер Ли Ён Хининг «Ханбок» анъанавий либослар намойиши, 14–15 октябрь кунлари ёшлар ўртасида таэквондо бўйича Корея Республикаси элчисининг кубоги учун баҳслар ўтказилади.

Шунингдек, 15 октябрь куни Sookmyung Gayageum ва B-boy гуруҳлари иштирокида корейс фьюжн-мусиқаси концерти ўтказилади. 17–20 октябрь кунлари Тошкентда корейс кинофестивали, 18–21 октябрь кунлари Бухорода кинофестиваль ва маданий тадбирлар, 21–22 октябрь кунлари машҳур корейс рассоми Ли Чун Собнинг ҳаёти ва ижодига бағишланган кўргазма ташкил этилиши режалаштирилмоқда.