Ўсмирлар ўртасидаги Осиё Чемпионатида Ўзбекистонни қолдириб кетган Ироқ Японияни ҳам мағлуб этди

Ҳиндистонда бўлиб ўтаётган ўсмир футболчилар ўртасидаги Осиё Чемпионатида финал иштирокчилари номи маълум бўлди. Бунга қадар Эрон, КХДР, Япония ва Ироқ термалари ярим финалга қадар етиб келиб, келаси йил бўлиб ўтадиган Жаҳон Чемпионатига йўлланмани қўлга киритганди.

Ярим финалнинг биринчи ўйинида Эрон ва КХДР термалари 1:1 ҳисобида дуранг ўйнади. Учрашувнинг 80-дақиқасида пенальтидан гол уриб, мағлубиятдан қутулиб қолган Шимолий кореялик футболчилар, ўйиндан кейинги пенальтилар сериясида имкониятни бой бериб қўйди — 5:6.

Япония ва Ироқ термалари ўртасида кечган ярим финалнинг иккинчи ўйинида эса ироқликларнинг қўли баланд келди — 4:2. Биринчи бўлимда кунчиқар юрт ўсмирлари 2:1 ҳисобида олдинда бораётганди. Иккинчи 45 дақиқаликда ироқликлар 3 та гол уришга муваффақ бўлди.

Япония ўсмирлар термаси ярим финалга қадар 4 та ўйинда майдонга тушиб, жами 22 та гол урган ва ўз дарвозасидан тўп ўтказиб юбормаганди.

2 октябрь куни Эрон ва Ироқ ўсмирлар термаси мусобақа ғолиби номини аниқлаб бериш учун майдонга тушади.