Ўзбекистон Президенти сайловини ўтказувчи 14-Тошкент шаҳар округ сайлов комиссияси томонидан оммавий ахборот воситалари вакиллари учун брифинг ўтказилди. Бу ҳақда «Дарё»га округ матбуот маркази хабар берди.
Унда мазкур округ сайлов комиссияси раиси А. Юнусходжаев ўтган вақт давомида сайловга тайёргарлик кўриш бўйича ўтказилган йиғилиш ва унда қабул қилинган қарорлар ҳақида маълумот берди.
Жумладан, маълум қилинишича, 30 сентябрь куни Президент сайловини ўтказувчи 14-Тошкент шаҳар округ сайлов комиссиясининг навбатдаги йиғилиши бўлиб ўтди ва унда «14-Тошкент шаҳар сайлов округи ҳудудида сайлов участкаларини тузиш тўғрисида»ги масала кўриб чиқилди.
Йиғилишда «Ўзбекистон Республикаси Президенти сайлови тўғрисида»ги қонуннинг 10 ва 11-моддаларига мувофиқ туман ҳокимликлари ҳамда ҳарбий қисм командирларининг сайлов участкаларини тузиш тўғрисидаги тақдимномаларини кўриб чиқиб, 14-Тошкент шаҳар сайлов округи ҳудудида жами 713 та сайлов участкаси тузилди. Сайлов участкаларининг тартиб рақамлари, чегаралари ҳамда уларнинг манзили кўрсатилган ҳолдаги рўйхати тасдиқланди. Шу билан бирга, туман ҳокимликлари сайлов участкаларининг чегаралари, уларнинг манзили ҳамда овоз бериш биноларининг жойлашиши ҳақида сайловчиларни хабардор этишни ташкил этиши лозимлиги масаласи ҳам кўриб чиқилди.
Йиғилишда қабул қилинган қарор туман ҳокимликларига ва тегишли идораларга ижро учун юборилади. Округ сайлов комиссиясининг бириктирилган аъзоларнинг жойларда ишларни ўрганиш чоғида алоҳида эътибор қаратиши лозим бўлган жиҳатлар ҳақида сўз юритилди. Хусусан, «Ўзбекистон Республикаси Президенти сайлови тўғрисида»ги қонуннинг 11 ва 20-моддаларига мувофиқ сайловни ўтказиш учун 14-Тошкент шаҳар сайлов округи ҳудудида ташкил этилган сайлов участкаларини, участка сайлов комиссияларини зарур бўлган давлат рамзлари (герб, байроқ), мебел жиҳозлари (стол-стуллар, гилам, китоб жавонлари, сейф, телевизор), алоқа воситалари (телефон, факс), техника (компьютер, принтер, ксерокс), комиссия фаолиятини ёритувчи стендлар билан таъминлаш, сайлов участкаси биноси ва участка сайлов комиссияси аъзолари учун ажратилган хоналарнинг, сайлов участкаларига бориш йўллари, бинога кириш йўллари ва йўлакларни таъмирлаш, сайлов участкаси ҳудудидаги ёритиш мосламаларининг аҳволини ўрганиш, зарур жойларда ёритиш мосламалари ўрнатиш ва атроф-ҳудудларни ободонлаштиришга эътибор қаратишлари зарурлиги кўрсатиб ўтилди.
Изоҳ (0)