Сурхондарёда санъаткорлар теримчилар учун кўнгилочар тадбирлар уюштирмоқда
Сурхондарё вилоят маданият ва спорт ишлари бошқармаси ташаббуси билан далаларда таниқли ижодкор ва санъаткорлар билан қизиқарли учрашувлар ташкил этилмоқда, деб хабар беради ЎзА. Жумладан, Маннон Уйғур номидаги Сурхондарё вилоят мусиқали драма театри, «Ўзбекнаво» эстрада бирлашмаси вилоят бўлими, туман ва шаҳар маданият уйлари санъаткорлари иштирокида ўтказилаётган тадбирлардан теримчилар мамнун.
Маннон Уйғур номидаги Сурхондарё вилояти мусиқали драма театри санъаткорлари Ангор, Шеробод, Музработ, Қизириқ туманларида бўлиб, дала меҳнаткашларига маданий хизмат кўрсатмоқда. Қизиқарли саҳна асарларидан парчалар намойиш этмоқда.
«Деҳқонларимизнинг заҳматли меҳнатлари эвазига етиштирилган ҳосилни қисқа муддатларда йиғиб-териб олиш барчамизга катта масъулият юклайди, — деди театр бош режиссёри Мансур Равшанов. — Айни пайтда белгиланган дастур асосида теримчиларнинг кўнгилли маданий хордиқ чиқаришига алоҳида эътибор қаратмоқдамиз. Эл суйган санъаткорлар туманларда бўлиб, пахтакорлар билан учрашмоқда. Ранг-баранг концерт дастури ва турли саҳна асарларидан парчалар намойиш этиб, теримчиларнинг маданий ҳордиқ чиқаришига хизмат қилаётир».
