Ўзбекистон делегацияси Озарбайжонда истеъмолчилар ҳуқуқларини ҳимоя қилиш фаолияти билан танишди
Ўзбекистон Истеъмолчилар ҳуқуқларини ҳимоя қилиш жамиятлари федерацияси (ЎИҲҲҚЖФ) делегацияси 22—26 сентябрь кунлари Озарбайжон Озод истеъмолчилар иттифоқи (ООИИ) таклифига биноан Озарбайжонга сафар қилди. Бу ҳақда UZ24 хабар бермоқда.
Сафар чоғида ЎИҲҲҚЖФ билан ООИИ ўртасида англашув меморандуми имзоланди. Унга кўра, томонлар ўзаро ахборот алмашиш, қўшма лойиҳалар ва дастурларни ишлаб чиқиш ва амалга ошириш, мутахассис ва делегациялар алмашуви, биргаликда учрашув, конференция, семинар ва симпозиумлар ташкил қилиш тўғрисида келишиб олди.
Ўзбекистон делегацияси аъзолари сафар давомида ООИИнинг Озарбайжон истеъмолчилари ҳуқуқларини ҳимоя қилиши борасидаги фаолияти билан яқиндан танишди. Озарбайжонлик ҳамкасбларга Ўзбекистонда ННТ фаолият юритиши учун яратилган шароитлар ва бевосита Федерация фаолияти ҳақида ҳикоя қилувчи видеоролик намойиш этилди.
Шунингдек, Озарбайжон президенти ҳузуридаги ННТни давлат қўллаб-қувватлаши бўйича кенгаш идораси, Иқтисодиёт вазирлиги ҳузуридаги Аксилмонополия сиёсати ва истеъмолчилар ҳуқуқларини ҳимоя қилиш бўйича давлат хизмати ва ННТ форумида учрашувлар ўтказиб, истеъмолчилар ҳуқуқларини ҳимоя қилиш юзасидан фикр алмашди.
