Нетаньяху Переснинг дафн маросимида Маҳмуд Аббоснинг иштирок этишига рухсат берди

Исроил бош вазири Биньямин Нетаньяху Фаластин етакчиси Маҳмуд Аббоснинг Исроилнинг собиқ президенти, марҳум Шимон Перес дафн маросимида иштирок этиш бўйича киритган сўровини қаноатлантирди. Бу ҳақда «ТАСС» хабар бермоқда.

«Аббоснинг собиқ президент Шимон Перес дафн маросимида иштирок этиш бўйича сўрови Нетаньяху томонидан қаноатлантирилди», — маълум қилди Haaretz нашри.

Илгарироқ Аббос бу борадаги сўровни Исроил ҳукуматининг Фаластин ҳудудидаги хатти-ҳаракатлари координатори генерал-майор Йоав Мордехайга йўллагани маълум қилинган эди.

Аббосга Фаластин контрразведкаси раҳбари Мажид Фараж, Фаластинни озод қилиш ташкилоти бош котиби Соҳиб Эрекат ҳамда Фаластин маъмуриятининг фуқаролик ишлари бўйича вазири Ҳусайн ал-Шайх ҳамроҳлик қилиши кутилмоқда.