Японияда ит ва мушукларнинг узоқ умр кўриши бўйича рекорд ўрнатилди

Япония нафақат одамларнинг, балки ит ва мушукларнинг энг узоқ умр кўрадиган мамлакати ҳисобланади. Ит ва мушукларнинг ушбу мамлакатда ўртача умри тегишли равишда 13,2 ва 11,9 йилга тенг бўлди. Бу ҳақда Bloomberg агентлигига таяниб, «Интерфакс» хабар бермоқда.

Уй жонзотларининг узоқ умр кўриши эмлаш, энг яхши ветеринария хизмати, нисбатан сифатли егулик ва дайди ҳайвонларнинг камайгани билан боғлиқ.

Японияда уй жонзотларининг сони болалар сонидан кўпроқ: мамлакатда 19,8 миллион уй итлари ва мушуклари яшайди. 2015 йилда Японияда 14 ёшгача бўлган болалар сони 15,9 миллион нафарни ташкил этган эди.

2010 йилда ўтказилган сўровномага кўра, Япониядаги 34 фоиз оилада уй ҳайвонлари бор.

Экспертларнинг таъкидлашича, Японияда туғилиш даражаси пасайиб кетгани, умр кўриш узайгани ҳамда ёлғиз инсонлар кўпайиб бораётгани учун аҳоли болаларнинг ўрнини уй жонзотлари билан тўлдирмоқда.

Шу сабабли ҳам жониворларнинг эгалари уларга катта миқдорда пул сарфлашга тайёр.