Озарбайжонда конституцияга ўзгартиришлар киритиш бўйича референдумда овоз бериш бошланди, деб ёзади «ТАСС». 125 та округдаги 5267 та участканинг барчаси очилди.
Референдумдан мақсад, ҳукумат вакиллари сўзларига кўра, давлат бошқаруви тизимини такомиллаштириш, хусусан, мамлакат раҳбариятида янги лавозимларни таъсис этиш, президент ва парламент депутати бўлиб сайланиш учун ёш чекловларини бекор қилиш.
Овоз берувчилар рўйхатига мамлакатнинг 5,26 миллион фуқароси киритилган. Овоз беришда сайловчиларнинг камида 25 фоизи қатнашсагина референдум бўлиб ўтди, деб тан олинади.
Бюллетенга 29 та банд киритилган, уларнинг ҳар бири таклиф этилаётган ўзгартириш ва қўшимчаларни акс эттиради. Референдум иштирокчиларининг 50 фоиздан ортиқ овозларини тўплаган тузатишлар қабул қилинди, деб ҳисобланилади.
Референдумнинг боришини 117 нафар халқаро ва 53 мингга яқин маҳаллий кузатувчилар назорат қилади.
Такрор овоз бериш олдини олиш учун сайловчиларнинг бош бармоғи рангсиз сиёҳ билан бўялади. Участкага киришда уларнинг бармоғи махсус ультрабинафшали лампа билан сканерланади. Шунингдек, бир нечта бюллетень ташлашга йўл қўймаслик учун барча участкаларда шаффоф қутилардан фойдаланилади.
Овоз бериш Тошкент вақти билан 20:00 га қадар давом этади.
Изоҳ (0)