Air France учувчилари Париж яқинидаги ўрмонга ўнлаб тонна ёқилғини тўкиб юборди

Air France авиакомпанияси самолётининг учувчилари Париж атрофида жойлашган Фонтенбло ўрмонига ёқилғисининг катта қисмини тўкишга мажбур бўлди. Бу ҳақда 26 сентябрь, душанба куни Direct Matin нашри маълум қилди.

Boeing йўловчи самолёти Франция пойтахтидан Гайанага 25 сентябрь тонгида парвоз қилди, бироқ тез орада техник муаммо туфайли ҳаво кемаси аэропортга қайтишга мажбур бўлди.

Қайтишда учувчилар самолётни енгиллаштириш мақсадида ёқилғининг катта қисмини тўкиб юборди. Нашрнинг маълум қилишича, гап ўнлаб тонна керосин ҳақида бормоқда.

Фонтенбло коммунаси мери Фредерик Валету юз берган ҳодисани қоралади. «Бу каби нарсаларга рухсат бериш — бу шармандалик. Фонтенбло ўрмонига йилига 10 миллион киши ташриф буюради. Бу табиий ҳудуд давлат муҳофазаси остида», — деб ёзди у Twitter’даги саҳифасида.