Брэд Питт 15 ёшли ўғли Меддокс билан қўпол муносабатда бўлгани учун жиноий таъқиб қилинмайди: полиция ва прокуратурада бунинг учун етарлича далиллар йўқ, деб хабар беради «ТАСС».
Ҳодиса ўтган ҳафтада хусусий самолётдаги рейс давомида рўй берди ва бу ҳақда Лос-Анжелес полициясига маълум қилган экипаж аъзоларидан бири туфайли жамоатчиликка ошкор бўлди. TMZ манбаларига кўра, Мэддокс Питтни ғазабга келтирган нимадир деган ва актёр, Анжелина Жоли иккисининг ўртасига туришга улгурганига қарамай, ўғлига ташланган.
Болалар ва оила ҳимояси округ бўлими ходимлари ўсмирни кўздан кечириб, унинг танасида зарбалар изини аниқламади. Гувоҳлар кўрсатмаси чалкаш бўлганлиги сабабли полиция ҳам юз берган воқеа тафсилотларига аниқлик киритолмади. Шунингдек, ҳозирча ҳеч ким ҳуқуқ-тартибот идораларига Питт устидан шикоят этиб мурожаат қилмади.
Илгарироқ Жоли Питтдан ажралиш ниятида тегишли ҳужжатларни топширгани маълум қилинган эди.
Изоҳ (0)