Ўзбекистонда интернет фойдаланувчилар сони 13 миллиондан ошди. Бу ҳақда, «Газета.uz» хабарига кўра, ICTSUMMIT 2016 да Ўзбекистон ахборот технологиялари ва коммуникацияларини ривожлантириш вазирининг биринчи ўринбосари Алишер Файзуллаев маълум қилди.
Алишер Файзуллаевнинг сўзларига кўра, аҳоли пунктларининг 92 фоизи мобил алоқа билан қамраб олинган, абонентлар сони 20,8 миллионни ташкил этмоқда.
Халқаро ахборот тармоқларига уланиш тезлиги сониясига салкам сониясига 35 гигабитга етган (2015 йил охирида сониясига 26,4 Гбит эди).
Магистрал телекоммуникация тармоғи халқаро ва туманлар даражасида 10, вилоятлар даражасида 4 маротаба кенгайтирилди.
Рақамли радиорелели ва оптик толали алоқа линиялари узунлиги 23,4 минг километрни ташкил этди.
Алишер Файзуллаев тармоқда эришилган муваффақиятларга қарамай, мамлакатда телекоммуникация инфраструктураси ривожланиши янада кўпроқ суръатларни талаб этишини таъкидлади.
Изоҳ (0)