Расмий Москва Киевни ва унинг «хорижлик кураторлари»ни Россия томонига етказилган зарар ва россиялик ҳарбий хизматчиларнинг ҳалокати жавобсиз қолмаслигидан огоҳлантирди. Бу ҳақда, Россия ТИВ баёнотига асосланиб, «ТАСС» хабар бермоқда.
«Қрим Республикасида барқарорлик ва хавфсизлик шак-шубҳасиз таъминланади», — дейилади баёнотда.
Бундан ташқари, Россия хорижлик ҳамкорларни Киевни хавфли қадамлар ташлашдан қайтаришга яна бир бор чақирди.
Қўлга олинганлар орасида Евгений Панов ва Андрей Захтей борлиги, улар ўз кўрсатмаларида айбларини тан олаётгани айтилди.
Россия ТИВ нуқтаи назарига кўра, Киев террор ва провокациялардан воз кечмас экан, Нормандия форматидаги учрашувлар (Россия, Германия, Франция, Украина) бирор маънога эга бўлмайди.
Эслатиб ўтамиз, 10 август куни Россия Федерал хавфсизлик хизмати 6–8 август кунлари Украина разведкаси режалаштирган бир қатор терактлар ва диверсияларнинг олди олингани, кўплаб жангарилар қўлга олингани, ярим оролда Қрим фойдасига ишлаётган агентлик тармоғи фош этилганини маълум қилди. Украина томони тез орада бу айбловларни инкор этди.
Бир муддатдан сўнг Украина президенти Пётр Порошенко фавқулодда йиғилиш ўтказиб, унда қўл остидагиларига Россия раҳбари Владимир Путин билан телефон мулоқотини ташкил этишни топширди. Йиғилиш чоғида разведка бош бошқармаси раҳбари Валерий Кондратюк Қрим чегарасида отишма келиб чиққанини айтди.
Изоҳ (0)