Украина хавфсизлик хизмати Россия Федерал хавфсизлик хизматининг Қрим ярим оролида расмий Киев томонидан терактлар тайёрлангани ҳақидаги айбловларини инкор этди. Бу ҳақда «Корреспондент.net» хабар бермоқда.
Бир муддат илгари Россия хавфсизлик хизмати 6–8 август кунлари ярим оролда Украина махсус кучларининг диверсион гуруҳлари қўлга олингани, уларнинг ёнидан кўп миқдорда қурол-яроғ бирликлари топилганини маълум қилган эди. Бундан ташқари, Қрим ҳудудида Украина фойдасига ишлаган агентлик тармоғи фош этилгани, Украина билан чегарада тўқнашув содир бўлгани айтилган эди. Аммо Украина томони бу иддаоларни рад этмоқда.
«Украина ўз ерларини куч билан эгалламайди ва қайтариб олмайди, биз бу ишни қилмаймиз. Буни сизга аниқ айта оламан», — деди Украина хавфсизлик хизмати раҳбарининг маслаҳатчиси Юрий Тандит «Интерфакс-Украина»га берган изоҳида.
«Шу боис бу нуқтаи назардан мен ФХХ ёки Мудофаа вазирлигининг баёнотини тўлалигича терс буриб юборишим мумкин. Яъни биз ўз ҳудудимизни куч билан қайтармаймиз. У шунақасига ҳам бизники, эгалик ҳуқуқи бизда», — қўшимча қилди Тандит.
Унинг таъкидлашича, Қримда Украина фуқаролари истиқомат қилади, шу боис расмий Киев уларга зарар келтириши мумкин бўлган қадамларни ташламайди.
«Биз бу ахборотни инкор этамиз», — хулоса қилди Тандит.
Изоҳ (0)