Шифокорлар Бразилия футболи афсонаси Пелега Рио–2016 Олимпиада ўйинлари машъаласини ёқишга рухсат берди, аммо унга мушаклардаги оғриқлар бу ишни амалга оширишга тўсқинлик қилиши мумкин. Бу ҳақда Reuters агентлигига таяниб, «ТАСС» хабар бермоқда.

Аввалроқ 75 ёшли бразилиялик 5 август куни «Маракана» стадионида бўлиб ўтадиган Рио–2016 Олимпиада ўйинларининг очилиш маросимида мусобақа машъаласини ёқиш учун расман таклиф олгани ҳақида хабар берилганди.

Пелега Олимпиада машъаласини ёқиш учун саломатлиги тўсқинлик қилиши мумкин. Декабрь ойида оёғининг сон қисмидан операция қилинганди ва ҳаракатланиш учун ҳассадан фойдаланмоқда. «Шифокорлар Пелега машъалани ёқишга рухсат берди, аммо барчаси унинг юришига халал берувчи мушакларидаги оғриққа боғлиқ», – деди Пеленинг расмий вакили.

Эслатиб ўтамиз, афсонавий футболчи Рио–2016 Олимпиада ўйинларига бағишланган «Умид» номли қўшиқ ёзди.